قدر ما أسوي في حبك بلاقي الشي البسوي قليل
نيالا حبيبة لا بتتواسي لا بنختار عيها بديل
نيالا الميرم المزدانة بالطبع السمح و أصيل
نيالا القزة والنقارة نار الخلوة والتهليل
سبحان ربي من سواك نموذج باهي زاهي جميل
نموذج في المعاني نبيل
نموذج يستحق تبجيل
نفاخر بي هواها بلاد تمنت تبقى ليها مثيل
ومن كرمك شوية تشيل
وجاتك لم طفح الكيل
وضاقت من لهيب الويل
بتطلب لي ملح وملاح بتطلب شان تشد الحيل
شالت واكتفت بالحيل
نيالا بتدي كل الجاها..كل الفي ظرف ناجاها...
عطايا في هدير السيل
في درب العلم والنور
لي الدار والبلد خليت
عن الجبراكة والضرا والمسيد
غصبا عن حبي فتّّ مشيت
بلاد الزول ولو جارت عليهو عزيزة
فما بالي
بلادي أنا ولا جارت ولا ظلمتني
بل معنى السلام والخوة ورتني
وآيات الجمال الفيها تتجلى وتحيرني
تزيد ايماني بي الخالقها خالقني
تطاول القامة في البنيان دا ايه يعني
قصاد خضرة بتسر البال
تزيد الحال
بها وجمال
قصاد خضره بتعبي الروح
عطر بيفوح
يلازم خاطري وين ما أروح
وعظمات ما قلم يحكيها
ولا شعري المنتظم بي دقه قادر يستفيض يرويها
يكفي تشوفها شان تسكر
تتوه في روعة المنظر
وعن هوسها الملازمني
أكيد يا صاحبي تعذرني
دا لو ما جيت
وليها بقيت
ذليل عاشق تنافسني
عن ذكرى البلد والناس
واحساس المحنة الخاص
طول الغربة
لا كليت
ولا مليت
ولا اتمنيت
تكون السكنى في غيرها
ولا أتزفّ غير سيره
بس يا ساده اتمنيت
بلادي تزيد في تطويرها
مبارك الحسن
الثلاثاء يونيو 14, 2011 12:24 am من طرف احمدالفاتح
